بنتعاتب على الماضي

بنتعاتب على الماضي
ونملى قلوبنا بقســــــــــاوة
وحقد وغــــِـــــل عـــالفاضى
ونسكت حبة نتفرج على الشــــارع
نلاقي الدنيا حدفتنا لحد الشارع التانى
تقـــــــول كلمة وأقــــــــــــول كلمة
يهيـج بينّا العتـــــــــــاب تاني
-
تفكرني بكــــــل كلام زمان بينّا
فى وسط الشلة والزحمة
وفي السكة وعالدكة ، وفي الالعاب
طريق مدرستى .. كنت نسيت خلاص شكله
لا أنا فاكره .. ولا نفسى أكون فاكره
لكن فاكر ، حزام إسود جميـــــل جداً
نتشته مني فى الالعاب
وروحت شكيتني للمستر !!!
وذنبنى !
ووقفنى كتـــــــــير جداً شــــِــــــمال الباب
وجاى تعاتبنى عالماضي
-
صحيح كنا زمان أصحــــــــــــــــاب
صحيــــح جايز
أقولك سر فى حكايتى مع الأصحاب
زمان كنا بنجرى هناك على الكوبري
ونتسابق
وكنت بتكسب اللعبة تملي بخـــــَـــــمْ
وأنا عمرى ما كنت بخــــُــــــــمْ
أنا امبارح مشيت في الشارع الفاضي لحد الشارع الزحمة
حروف أسامينا ... أحلامنا وملامحنا
وشوش الناس بتعكسها
فرح أختك فى شقتنا ... وطرحتها ، وفرحتها
عبير الشارع الزحمة فى أفراحنا
إزازة زيت بتتنقل بطول الشارع المليان
وفـــُــرنة عيش بتجمعني أنا وأنت
طابورها طويل .. لكن بيهون على الغلبان
وزحمة سير فى قلب ميدان كبير جداً
أبويا وأبوك بيتقابلوا هناك دايماً فى مطرحنا
..
بــــُــكا أمي على أُمك
رصيف مكسور يكعبلنا
وعجلة قديمة هلكانة أبويا رماها فى المنوّر
رحيل أصحابنا م الشارع
عـــِـــــزال أشرف وأمنيّة ، وعم سمير فؤاد كساب
أنا وأنت صحيح كنا زمان أصحاب !
صحيح .. ينفع نكون تانى ، صحيح أصحاب ؟
بلاش تفضل تعاتبني
لا أنا عايش ما بين الناس على إنى ملاك تايه
ولا فاضي أكررلك كلام وعتـــــــــــــــــــــــــــــــــــاب

لـِ أحمد مهنى

https://www.facebook.com/photo.php?fbid=306359996041445&set=a.303507389660039.85610.303489706328474&type=1&ref=nf