إرسال مباشر
إرسال مباشر وغير مباشر
ومذيعة حلوة ومذيعة أحلى
ده يقول فى رأيه وده يضاده
ومذيع يسَخن والسهرة تحلى
وألاقى فاصل؟!
وإعلان جديد لشامبو نازل
ما أعرفش إمتى
بضطر أغير بريموت صغير
وأسمع أغنية يا واحشنى إنت
بلاقى واحدة ملامحها واحدة
رجليها باينة وفيها وحمة
وأسمع أغانى مالهاش معانى
بضطر أغير لاتجيلى جلطة
وفجأة أسكت
يملانى خوف تسكنى رعشة
وأسمع صوات وأسمع زعيق
وناس بتبكى
وشاب شايل سلاحه فى إيدى
عمال بيجرى
وبنت تايهة عيونها باكية
مش قادرة تشكى
بضطر أقلب !!!
وعارف إنى على نفسى بكدب
بلبس هدومى الروشة طبعا
وفى شعرى جل بيزيده لمعا
باخد سجاير وأخد فلوسى
وأقول لنفسى ع الدنيا دوسى
فى حاجة فيا بتقولى ليه؟
سايب حياتك خلطبيطة
وحاجات كتير بتقولى كبر
الحياة رقص وزيطة
بنزل وبمشى ....
وألاقى ياما كتير بيمشى
طريقنا واحد
نهايتنا واحدة
ولا حد قادر لغيره يشكى
وعشان أكبر
بدخل فى سيبر
وأعملى شات ع الماسنجر
وألاقى واد يعملى بنت
وأنا على أحذر وأفذر
برجع لبيتى وأمسك ريموتى
بفتح بلاقى بث معاد
ده يقول فى رايه وده يضاده
ومذيع يسَخن والصوت بيعلى
أفكار جديدة وأفكار قديمة
وحقيقة ضايعة
إرسال مباشر
فى قلبى ناشر
يجى الف دمعه
وكل دمعه بتزق دمعه
والدنيا والعه
وناس كتير
مابقتش سامعه
من الحر خالعه
إرسال مباشر
لكنه كاسر
يصدر أومر
ومفيش ممانعه
لـِ محمد مختار
