كل حدود الكون
شايله حمول أوزان أوزانها
بتجمع قوتها وترجع بيتها
شق صغير بين جدارين
كل حدود الكون ف خيالها
يدوب مترين
تحبس نفسك ليه يا انسان
جوه حدود تفكير النمله
وعنيك شايفه براح الكون
بين علم ودين
أصلك مخلوق
من روح إلهيه وقبضة طين
وحياه بتقضيها صراع فى معادله
ما بين الاتنين
ليه بس تعيش نزعة طينك
والنص التانى بتساه
برواز أضلاعه من الشهوه
بتحوم الغربان جواه
صدقت ان حواسك خمسه؟
ونسيت أغلى وأعظم حاسه
فك قيود الطين من أيدك
واسبح جوه جمال الكون
ارمى هموم الدنيا بحالها مع نعليك
يخشع قلبك يبكى بحرقه قبل عنيك
تحس برعشة خوف مع رهبه
فى نفس اللحظه بشوق وحنين
اجمل حاسه هتشعر بيها
دى جوه السجده
هى سلاحك جوه صراعك
بين روح إلهيه ونزعة طين
لـِ أحمد هيكل
